مافيهاش شك، اللحظة لي تعرف فيها بلي قبلوك لمقابلة العمل هي من أحسن لحظات حياتك، خصوصا إذا كانت الفرصة لوظيفة أحلامك.بصّح واش لوكان نقولك بلي 49% من مسؤولي التوظيف ياخذو قرارهم بخصوص ملائمتك للمنصب في أول 90 ثانية من اللقاء؟ هذا يعني بلي مظهرك واختيار ملابسك عندهم دور كبير في نجاحك.
في هذا المقال، رح تكتشف العوامل الأساسية لي تحدد مظهرك في المقابلة، القطع الأساسية لي لازم تختارها، الأخطاء الشائعة لي لازم تتجنبها، ونصائح من الخبراء لي تساعدك في رفع مستوى مظهرك وتزيد فرصك في الحصول على الوظيفة.
قواعد اللباس في الشركات تختلف بزاف على حساب المجال والثقافة التنظيمية للمؤسسة، لي تعكس القيم والمبادئ تاع بيئة العمل. مثلاً، إذا كانت المقابلة في شركة ناشئة، مظهرك لازم يكون أقل رسمية، يعني كاش حاجة مريحة وبسيطة. أما إذا كانت المقابلة في إدارة عمومية أو بنك مثلا ، فغالبًا لازم تكون أكثر رسمية، حيث المؤسسات هادي عادة عندهم قواعد لبس دقيقة وأنيقة.
المنصب لي راك تتقدم له عنده تأثير كبير على اختيار ملابسك. إذا كنت رايح لمقابلة منصب تع إطار إداري، الملابس تاعك غالبًا تكون رسمية بزاف، كيما الكوستيم، الشوميز، وصبّاط كلاسيك. أما إذا كنت رايح على منصب تنفيذي أو تقني، عندك حرية في اختيار ستايل مريح أكثر.
الطقس يلعب دور كبير في اختيار الملابس. كي يكون الحمّان، الأفضل تختار ملابس خفيفة و الكتان يكون من القطن، والألوان الفاتحة لي تساعدك تبقى مرتاح. أما في الشتاء، لازم تركز على الملابس الدافية، كيما المعاطف أو البليزر، ويفضل تختار أقمشة ثقيلة كيما الصوف أو الكشمير، باش تبقى دافي ومحافظ على الحطّة تاعك في نفس الوقت.
كيما نقولو، إذا بغيت تخلّي انطباع أول يدوم في مقابلة العمل، البدلة هي أساس المظهر تاعك.
البدلة الداكنة هي الخيار المثالي لمظهرك المهني، غادي تعطيك طابع الأناقة والاحترافية. الكوستيم فالأزرق الغامق أو الرمادي الداكن هي ألوان كلاسيكية و ما تخيبش في أي مناسبة. لازم البدلة تكون متناسبة مع جسمك، يعني السراويل تكون بالطول الصحيح من غير فراغات، والطية القدامية تاع البدلة لازم تكون مرتبة وتعكس الراحة والأناقة في نفس الوقت. والأكتاف لازم تكون على قد كتافك باش تعطيك مظهر متناسق وأنيق.
اختار ألوانًا محايدة مثل الأبيض أو الأزرق الفاتح، أو الكحلي أو الرمادي الفاتح. تأكد من أنه جا قدّك، مع أكمام طويلة شوي على أكمام الكوستيم. اختار كول فيه قفالي ولّا كول عريض، والقماش من القطن باش تبقى أنيق و مرتاح في نفس الوقت . تجنب التفاصيل الزايدة، وتأكد من أنها نظيفة وفي حالة جيدة.
من الأفضل تختار ربطة عنق فيها لون واحد برك أو فيها أشكال خفيفة كيما الخطوط الرقيقة أو النقاط الصغيرة، لي تبينك في مظهر الاحترافية والجدية. الألوان المناسبة هي الكحلي، البوردو، أو الأخضر الداكن، لي تزيد من أناقتك بلا ما تشوّش الانتباه. تأكد بلي الكرافاطة مش طويلة بزاف ولا قصير، لازم توصل لنص حزام السروال. والعرض تعها لازم يكون متناسق مع عرض الكول تع الكوستيم باش ما يكونش المظهر غير متوازن. خلي الرباط دايما مرتب طوال المقابلة، وإذا احتجت، استعمل بانس بسيط باش يبقى في مكانه.
الصباط الكلاسيك في اللون الأسود أو البني هو أفضل خيار. قبل المقابلة بيوم تأكد بلّي راه نقي ومسيرج، لأن الأحذية الجيدة تعكس مدى اهتمامك بالتفاصيل. إذا كنت غادي تلبس كوستيم اختار أحذية عندها تصميم كلاسيكي. أمّا إذا منت رايح لبيئات العمل غير الرسمية، تقدر تختار أحذية أقل رسمية كيما التينيسات ( الأحذية الرياضية) الأنيقة ولا الأحذية المريحة المهم تكون تتناسب مع الحوايج و الألوان الي اخترتها
الملابس لي فيها زخرفات أو شعارات: تجنب الحوايج لي فيهم زواق مبالغ فيه ولا شعارات كبيرة، لأنها تقدر تظهر غير احترافية أو تشتت الانتباه.
الملابس المبالغ فيها: تجنب الملابس لي تكون مبالغ فيها أو تعطي انطباع بالغموض أو التسلط، لأنها تقدر تعطي انطباع سلبي.
الكثير من الألوان: من الأفضل ما تلبسش أكثر من لونين في نفس الإطلالة، لأن العديد من الألوان يقدروا يخلّوا المظهر غير مرتب.
ربطات عنق نيون أو ألوان زاهية: تجنب ربطات العنق لي تكون بألوان زاهية أو مشعة لأنها تقدر تشتت الانتباه.
الجوارب: الجوارب البيضاء ممنوعة؛ لازم تختار ألوان داكنة تتناسب مع ملابسك.
الجينز: حتى في بيئات العمل غير الرسمية، الجينز ما يصلحش في المقابلات لأنه ما يعكسش الجدية والاحترافية لي لازم تكون في المقابلة.
الإكسسوارات: تجنب كثرة الإكسسوارات. الإكسسوارات البسيطة أفضل، لأن الكثير منها يقدر يشتت الانتباه عن انطباعك العام.
الشعر: تأكد بلي شعرك نظيف ومرتب. سواء كان قصير أو طويل، لازم يكون دايماً في أفضل حالاته باش يبان بلي تهتم بالنظافة الشخصية والمهنية.
العناية باللحية وتمشيطها: إذا عندك لحية، ديرليها العناية اللازمة باش تبان مرتبة ومهندمة. ثاني، تمشط لحيتك بانتظام باش تبقى مرتبة وطبيعية، هذي حاجة تبين بلي تهتم بالتفاصيل.
رائحة منعشة: تأكد بلي ريحتك طيبة ومنعشة. اخطيك من العطور القوية أو الثقيلة. ريحة خفيفة وعطرة تعطي انطباع راقي من غير ما تكون ثقيلة.
البساطة: خلي مظهرك بسيط. اختار ملابس أنيقة وما تكونش مبالغ فيها. البساطة تعكس الثقة بالنفس والمهنية وتخلي شخصيتك الحقيقية تبرز.
الابتسامة: الابتسامة هي سر الانطباع الأول الجيد. ابتسم بشكل طبيعي في المقابلة باش تبان ناس ملاح وفرحان، وهاكا تخلق جو إيجابي مع الشخص اللي داير معاك المقابلة.
الثقة بالنفس: الثقة بالنفس ضرورية باش تبين قوتك الشخصية في المقابلة. اهدر بوضوح وبهدوء، وبعّد على التوتر، لأن الثقة تاعك تزيد فرص نجاحك.
الاهتمام بالتفاصيل الصغيرة: خلي كل حاجة في مظهرك تعكس العناية بالتفاصيل، من السباط النقي والمسيرج للحوايج المحددين، وحتى الوقفة الصحيحة. هذي التفاصيل الصغيرة تخلي انطباعك الأول ما يتنساش..
إذا كنت تبّعت هذا الدليل باش تكون في أفضل حلة ومظهر احترافي في أول مقابلة عمل لك، ما فيهاش شك أنك غادي تكون بأحسن صورة. تفكّر دايما بلي ، البساطة والنظافة هما سر الجاذبية في المظهر، مهما كانت ملابسك. وضروك، مع كل التحضير والحماس اللي عندك، جا الوقت باش تشاركنا باختيارك للملابس اللي راح تلبسها في هذي المقابلة المهمة. راح تختار بدلة أنيقة، ولا تروح لمظهر غير رسمي وأنيق؟ ورينا كيفاش غادي تخلعهم بالحطّة تاعك ..
