ما هي نزهة كولاكشن؟
نُزهة هي ماركة جزائرية صاعدة تأسست سنة 2022 على يد توأمتين جزائريتين شغوفتين بالموضة والأصالة. جاءت فكرة تأسيس هذه الماركة من رغبة شخصية دفينة، الفتاتان شعرتا بغياب تصاميم تعبّر عن ذوقهما الخاص في السوق، خصوصاً في الجمع بين البساطة، الأناقة، والتميّز. ومن هنا، قررتا ابتكار ما كانتا تبحثان عنه بأنفسهما، وتحول شغفهما إلى مشروع يعكس بصمتهما الخاصة، ليقدّم خياراً مثالياً لكل جزائرية ترى في الأناقة أسلوب حياة.
لماذا “نُزهة”؟ اختارت الشقيقتان اسم “نُزهة” لأنه يعكس صورة المرأة الجزائرية كما
تتصورانها: أنيقة، فريدة، واثقة بنفسها.
“نُزهة” ليس مجرد اسم، بل هو انعكاس لروح أنثوية متجددة، تجمع بين الذوق الرفيع والحضور اللافت، بكل بساطة وتميّز
انطلقت نزهة بتصميم الأزياء التقليدية مثل القفطان و الجبة. سرعان ما توسعت لتشمل أيضاً الملابس اليومية بلمسة جزائرية فريدة.
ماركة نزهة لا تكتفي بإنتاج الملابس، بل تسعى لخلق هوية بصرية وثقافية تُشبه جيل اليوم، تربط الماضي بالحاضر، وتمنح الفتيات الجزائريات منصة للتعبير عن أنفسهن بقطع فريدة، تحمل قصة وهوية.
الصعوبات و التحديات
أفكار نزهة الجميلة مرت برحلة شاقة قبل أن تصل إلى هدف تحقيق رؤية الأختين التوأم.
من بين أصعب الحوايج اللي صادفتها كانت قلة التصاميم اللي تناسب رؤيتها، وزيد ماكانش من السهل تلقى خياطات ولا عاملات عندهم خبرة ويقدرو يطبقو الأفكار تاعها بدقة.
الاهداف و التطورات المستقبلية
نزهة حكْات لينا بحماس على الأهداف ديالها والطموحات تاعها للمستقبل، وكلامها كان يبيّن قدّاه تحب المجال اللي راهي تخدم فيه.
ايناس: هل عندك مخططات معينة للمستقبل؟ و كيفاش راكي حابة طوري الماركة تاعك؟
نزهة: انا حابة نطوّر المشروع تاعي خطوة بخطوة، ونشوفو يكبر ويتجاوز الحدود اللي راه فيها، ويولي اسم قوي ومعروف في عالم الموضة.
من بين الأحلامي نفتح ورشة خاصة بي، تكون مجهزة بكل الأدوات والمعايير اللي تناسب الذوق تاعي وطريقة خدمتي. نحبها تكون بلاصة منظمة، نستعمل فيها تقنيات عصرية، ونخدم مع نساء عندهم الحرفة ويكونو ثقة، باش يحيّو التصاميم بدقّة وجودة عالية.
ايناس: كيفاش راكي تشوفي فالمستقبل تاع الماركة ديالك؟
نزهة: ما نشوفش الماركة تاعي كمحل صغير محلي فقط، بل حابة نوسّع الخدمة تاعي وتوصل لكل جهة في الجزائر، وتولي ماركة "Nezha" موجودة في كل ولاية، وتكون متوفرة للناس اللي يشاركوني نفس الذوق والرؤية. والطموح تاعي ما وقفش هنا، راني نحلم ندي الماركة تاعي للعالمية، وتمثل الموضة الجزائرية بفخر في الأسواق الدولية.
بالنسبة ليها، كل قطعة تصمّمها تحمل رسالة — تعبر على الهوية الجزائرية بطريقة عصرية وأنيقة. وهي مؤمنة باللي بالإجتهاد، والإبداع، والصبر، كلش يقدر يتحقق.
في الختام، ماركة Nezha تمثل تجربة حقيقية لبدء مشروع في مجال الموضة بموارد بسيطة وأفكار واضحة. التوأم المؤسسة واجهت صعوبات واقعية في السوق، من قلة المواد واليد العاملة إلى محدودية الخيارات، لكنها حاولت تخدم على مشروعها حسب الإمكانيات المتوفرة. اليوم، Nezha collection تطمح تتوسع بشكل تدريجي، تفتح ورشتها الخاصة، وتوصل تصاميمها لأكبر عدد ممكن من الزبونات داخل الجزائر، ومع الوقت ربما تفتح آفاق جديدة خارج البلاد.
